1.1 Осы жария оферта (бұдан әрі — «Оферта») «Астана» халықаралық қаржы орталығында (бұдан әрі — «АХҚО») тіркелген Pulsar.ai Ltd. Жеке компаниясының (БСН 260440900648, орналасқан жері: Қазақстан Республикасы, Астана қаласы, Есіл ауданы, Достық көшесі, 5/2 үй, ВП 3, пошта индексі 010000) (бұдан әрі — «Оператор») он сегіз жасқа толған кез келген әрекетке қабілетті жеке тұлғамен — көлік құралының жүргізушісімен немесе иесімен (бұдан әрі — «Пайдаланушы») көлік құралының техникалық жай-күйін тексеру сервисін ұсыну туралы шарт жасасу жөніндегі ұсынысы болып табылады.

1.2 Оферта Қазақстан Республикасы Азаматтық кодексінің (бұдан әрі — «ҚР АК») 395-бабының мағынасында жария болып табылады. Пайдаланушының 7-бөлімде көрсетілген акцепт жөніндегі әрекеттерді жасауы ҚР АК-нің 152 және 396-баптарына сәйкес Оферта талаптарын толық әрі сөзсіз қабылдағанын білдіреді.

1.3 Дербес деректерге қатысты бөлігінде Оферта бір мезгілде Пайдаланушының «Дербес деректер және оларды қорғау туралы» 2013 жылғы 21 мамырдағы № 94-V Қазақстан Республикасының Заңына (бұдан әрі — «ДД туралы Заң»), 2026 жылғы 9 қаңтардағы № 255-VIII Қазақстан Республикасының Цифрлық кодексіне (бұдан әрі — «Цифрлық кодекс») және «Жасанды интеллект туралы» 2025 жылғы 17 қарашадағы № 230-VIII Қазақстан Республикасының Заңына (бұдан әрі — «ЖИ туралы Заң») сәйкес ресімделген келісімі болып табылады.

1.4 Оператор АХҚО-да тіркелгендіктен, дербес деректерді өңдеуге қосымша AIFC Data Protection Regulations 2017 және AIFC Data Protection Rules 2018 (бұдан әрі бірлесіп — «АХҚО Қағидалары») қолданылады. Талаптар алшақ болған жағдайда Оператор Пайдаланушының құқықтарын қорғаудың неғұрлым қатаң стандартын қолданады. АХҚО Қағидаларының қолданылуы Пайдаланушының Қазақстан Республикасының заңнамасы бойынша құқықтарын және оның Қазақстан Республикасының уәкілетті органына және соттарына жүгіну құқығын шектемейді. Егер Пайдаланушы Оферта талаптарымен келіспесе, ол акцепт жасамауға және сканерлеуден өтпеуге тиіс. Бас тарту ол үшін қолайсыз салдарға әкеп соқпайды.

• КҚ — сканерлеуден өтетін көлік құралы.
• Сканерлеу — КҚ-ның Оператордың сканерлеу құрылғысы арқылы өтуі; бұл ретте бейнелер тіркеліп, кейіннен жасанды интеллект қолданыла отырып талданады.
• Есеп — Оператор қалыптастыратын КҚ техникалық жай-күйін талдау нәтижесі.
• Бот — Оператордың Telegram мессенджеріндегі @pulsar_ai_bot чат-боты; ол арқылы Пайдаланушы Офертаны қабылдайды және Есепті алады.
• КАО Solutions — «KAO Solutions» ЖШС, БСН 250640020303, Autocheck.kz сервисінің операторы; алынған деректерге қатысты дербес оператор ретінде әрекет етеді.
• Классифайдтар — хабарландырулар орналастыру және КҚ бағалау алаңдары, оның ішінде «Колеса» АҚ, БСН 970440003326 (Kolesa.kz), Kolesa Group-тың өзге де жобалары, сондай-ақ ұқсас алаңдар.
• Сервис орталықтары — техникалық қызмет көрсету станциялары, дилерлік және сервис орталықтары, шинамонтаж және шанақ шеберханалары, диагностика және техникалық байқау орталықтары.
• Серіктестер — КАО Solutions, Классифайдтар, Сервис орталықтары және 5-бөлімде көрсетілген өзге де үшінші тұлғалар.

3.1 Оператор жасанды интеллектіні қолдана отырып, КҚ-ның техникалық жай-күйін (түбін, шиналарын, көзге көрінетін тораптары мен агрегаттарын) талдайды және Есепті қалыптастырады.

3.2 Есеп мыналарды қамтуы мүмкін: мемлекеттік тіркеу нөмірі және (немесе) VIN; түбінің, тораптарының және шиналарының бейнелері; талдау нәтижелері (анықталған ақаулар және жай-күйді бағалау); сканерлеудің күні, уақыты және орны.

3.3 Оператор Пайдаланушыға қызметтің жасанды интеллект жүйесі қолданыла отырып көрсетілетінін және талдау нәтижелерінің автоматтандырылған түрде қалыптастырылатынын хабарлайды. Есептің синтетикалық (генерацияланған) элементтері, олар болған жағдайда, ЖИ туралы Заң талап ететіндей, машинамен оқылатын нысанда визуалды ескертумен таңбаланады.

3.4 Есеп ақпараттық-техникалық сипатта болады, сараптама қорытындысы, ресми техникалық куәландыру немесе КҚ-ның ақаусыздығының кепілдігі болып табылмайды және Қазақстан Республикасының заңнамасында көзделген міндетті рәсімдерді, сондай-ақ көзбен қарап тексеру мен диагностиканы алмастырмайды.

3.5 Пайдаланушы нәтиженің алгоритмдік жүйемен қалыптастырылғанын растауды, нәтижеге әсер еткен негізгі факторлар туралы түсінікті түсіндірмені (бастапқы кодты және модельдердің параметрлерін ашпастан) алуға және нәтижені маман қатысуымен қайта қарауды талап етуге құқылы (Цифрлық кодекстің 43-бабы, ЖИ туралы Заң). Өтініштер support@scans.kz мекенжайына жіберіледі.

4.1 Сервис шеңберінде мыналар өңделеді:
• КҚ-ның мемлекеттік тіркеу нөмірі және (немесе) VIN;
• КҚ-ның бейнелері (түбі, тораптары, шиналары) және оларды талдау нәтижелері;
• сканерлеудің күні, уақыты және орны;
• Пайдаланушының Telegram-дағы аккаунт деректері (пайдаланушы мен чаттың сәйкестендіргіші, пайдаланушы аты), сондай-ақ телефон нөмірі — егер Пайдаланушы оны ұсынған болса;
• акцептің техникалық деректері: күні мен уақыты, акцепт тәсілі, Оферта редакциясы, таңдалған келісімдердің құрамы;
• Пайдаланушы өз еркімен ұсынған өзге де деректер.

4.2 Оператор биометриялық деректерді мақсатты түрде жинауды жүзеге асырмайды және биометриялық аутентификацияны қолданбайды (Цифрлық кодекстің 48-бабы). Кадрға адамдардың бет-бейнелері кездейсоқ түскен жағдайда өңдеудің мүмкіндігінше ерте сатысында маскалау қолданылады.

4.3 Оператор Пайдаланушының жеке басын, оның мінез-құлқын немесе төлем қабілеттілігін бағаламайды және сервисті әлеуметтік скоринг үшін пайдаланбайды.

5.1 Пайдаланушыға Есепті қалыптастыру және ұсыну, сондай-ақ Есепті және оған байланысты хабарламаларды Бот арқылы жіберу.

5.2 Есепті және оған қатысты деректерді КАО Solutions-қа, одан әрі Серіктестерге Пайдаланушыға қызметтер көрсету үшін беру, атап айтқанда:
• КАО Solutions (Autocheck.kz) — сканерлеу нәтижелерін КҚ-ны тексеру туралы есептерге енгізу;
• Классифайдтар — «Колеса» АҚ (Kolesa.kz), Kolesa Group-тың өзге де жобалары және ұқсас алаңдар: хабарландыруда КҚ-ның техникалық жай-күйін растау, бағалау және сатылым алдындағы дайындық;
• Сервис орталықтары — анықталған ақауларды жою жөніндегі ұсыныстар, диагностикаға және жөндеуге жазылу, қосалқы бөлшектерді іріктеу;
• қаржы ұйымдары — кредиттік, төлем және лизингтік өнімдер;
• сақтандыру ұйымдары — сақтандыру өнімдері, КҚ тәуекелдерін бағалау және шығындарды реттеу;
• жол инфрақұрылымы және қауіпсіздік — оның ішінде «ҚазАвтоЖол» ұлттық компаниясы» АҚ;
• экология — экологиялық мониторинг және КҚ-ның қоршаған ортаға әсерін бағалау;
• өзге де серіктестер — Оператордың және (немесе) КАО Solutions-тың ынтымақтастық туралы шарттары жасалған үшінші тұлғалар, осындай шарттардың мақсаттары шегінде.

5.3 Деректерді Оператордың жасанды интеллект модельдерін әзірлеу және оқыту үшін иесіздендірілген түрде пайдалану — 6-бөлімнің талаптарымен.

5.4 Заңнама талаптарын орындау және Оператордың құқықтары мен заңды мүдделерін қорғау.

5.5 5.2 және 5.3-тармақтарда көрсетілген мақсаттарға келісім бөлек сұратылады және берілмеуі мүмкін. Олардан бас тарту Есепті алуға кедергі келтірмейді.

5.6 Алушылар санаттарының және негізгі Серіктестердің атауларының өзекті тізбесі scans.kz мекенжайында жарияланады және Пайдаланушыға сұрау салу бойынша беріледі. Келісім өзгеруі мүмкін атаулы тізбеге емес, алушылардың санаттары мен мақсаттарына беріледі.

6.1 Деректерді кез келген үшінші тұлғаға беру мыналарды көздейтін жазбаша шарт жасалған кезде ғана жүзеге асырылады: деректердің құпиялылығы; тек мәлімделген мақсаттарда пайдалану; құқықтық негізсіз одан әрі таратуға тыйым салу; Қазақстан Республикасының заңнамасында және АХҚО Қағидаларында белгіленген деңгейден төмен емес қорғау деңгейі; Пайдаланушының құқықтарын іске асыруға жәрдемдесу және Операторды инциденттер туралы хабардар ету міндеті. Мұндай шарт болмаған жағдайда деректер берілмейді.

6.2 АХҚО шегінен тыс беру. Қазақстан Республикасы АХҚО Қағидалары бойынша қорғаудың барабар деңгейі бар юрисдикциялар тізбесіне кірмейді, сондықтан Қазақстан Республикасында орналасқан Серіктестерге деректерді беру Пайдаланушының Офертаны акцептеу арқылы білдірілген жазбаша келісімі негізінде және (немесе) Пайдаланушымен жасалған шартты орындау қажеттілігіне байланысты жүзеге асырылады.

6.3 Қазақстан Республикасының шегінен тыс трансшекаралық беру қабылдаушы тараптың деректерді қорғауды қамтамасыз етуі шартымен және Пайдаланушының келісімі негізінде жүзеге асырылады (ДД туралы Заңның 16-бабы). Оператор Цифрлық кодекстің цифрлық деректер өнімдерінің айналымы мен сақталуына қатысты шектеулерін сақтайды; шикі деректер мен дербес деректер мұндай айналымның нысанасы болып табылмайды.

6.4 Деректер КАО Solutions-қа құқыққа сай берілген сәттен бастап оларды одан әрі өңдеуді КАО Solutions дербес оператор ретінде жүзеге асырады; оның әрекеттері үшін және деректерді Серіктестерге беруі үшін Оператор жауапты болмайды. Бұл дербес операторлар болып табылатын өзге де Серіктестерге қатысты да қолданылады.

6.5 Егер Серіктес Есепті Пайдаланушыға қатысты автоматтандырылған шешім қабылдау үшін пайдаланса (сақтандыру андеррайтингі, кредиттік скоринг, КҚ-ны бағалау), Цифрлық кодекстің 43-бабы және ЖИ туралы Заң бойынша міндеттерді осы Серіктес атқарады.

7.1 Пайдаланушы Оператордың иесіздендірілген деректерді (Пайдаланушыны тікелей сәйкестендірмейтін бейнелер мен талдау нәтижелерін) жасанды интеллект модельдері мен алгоритмдерін әзірлеу, оқыту және жетілдіру үшін пайдалануына келісім береді. Мұндай деректер мерзімсіз сақталуы және пайдаланылуы мүмкін.

7.2 Пайдаланушының өз деректерін жою, анонимдендіру немесе өңдеуді шектеу туралы өтінішін (Цифрлық кодекстің 41-бабы) алған сәттен бастап Оператор оның дербес деректерін модельдерді одан әрі оқыту үшін пайдалануды тоқтатады. Бұрын жүзеге асырылған оқыту күшін жоюға жатпайды, өйткені оқытылып қойған модельде жекелеген деректердің үлесін бөліп көрсету техникалық тұрғыдан мүмкін емес.

7.3 Иесіздендірілген деректерге келісімді кері қайтарып алу туралы ережелер қолданылмайды.

8.1 Акцепт Ботта жасалады. Пайдаланушы Ботқа сканерлеу алаңында орналастырылған QR-код бойынша, сілтеме арқылы немесе Telegram-дағы іздеу арқылы өтеді.

8.2 Ботты ашу («/start» командасы) өздігінен акцепт болып табылмайды. Ашылғаннан кейін Бот Пайдаланушыға деректерді өңдеу туралы қысқаша хабарламасы (№1 қосымша) және Оферта мәтінінің толық нұсқасына сілтемесі бар хабар жібереді.

8.3 Пайдаланушының осы хабардың астындағы «СТАРТ» түймесін басуы акцепт болып табылады. Түйме мынадай жазбамен қоса беріледі: «“СТАРТ” түймесін басу арқылы мен Жария офертамен келісетінімді растаймын және дербес деректерімді өңдеуге келісім беремін». Түймені басу АХҚО Қағидаларының мағынасында Пайдаланушының айқын растайтын әрекеті және ҚР АК-нің 396-бабының мағынасында конклюденттік әрекет болып табылады.

9.1 Пайдаланушы мыналарға құқылы:
• 8.6-тармақта көзделген тәртіппен келісімді толық немесе ішінара кері қайтарып алуға;
• өңделетін деректер, өңдеу мақсаттары және алушылардың санаттары туралы ақпарат алуға;
• оларды нақтылауды, бұғаттауды немесе жоюды талап етуге;
• өз деректерін жоюды, анонимдендіруді немесе өңдеуді шектеуді талап етуге (Цифрлық кодекстің 41-бабы);
• өңдеуге, оның ішінде тікелей маркетинг мақсатындағы өңдеуге қарсылық білдіруге;
• 3.5-тармақта көзделген құқықтарды іске асыруға;
• Оператордың әрекеттеріне (әрекетсіздігіне) Қазақстан Республикасының уәкілетті органына шағымдануға, сондай-ақ АХҚО-ның Commissioner of Data Protection-ына шағым беруге.

9.2 Келісім кері қайтарып алынғаннан кейін Оператор Пайдаланушының деректерін өңдеуді және беруді тоқтатады, мыналарды қоспағанда: (a) бұрын Серіктестерге құқыққа сай берілген деректер — оларға қатысты өңдеу тиісті дербес оператормен реттеледі; (b) оқыту үшін пайдаланылған иесіздендірілген деректер; (c) өңдеу заң бойынша не құқықтар мен заңды мүдделерді қорғау үшін қажет болатын жағдайлар.

9.3 Келісімді кері қайтарып алудың кері күші жоқ. Өтініштер [•] жұмыс күні ішінде қаралады; жою туралы талап туралы Оператор деректер берілген Серіктестерді хабардар етеді.

10.1 Дербес деректер [келісім кері қайтарып алынғанға дейін / N жыл] мерзім ішінде өңделеді, содан кейін жойылады немесе иесіздендіріледі, оларды сақтау заңнамада талап етілетін жағдайларды қоспағанда. Иесіздендірілген деректер мерзімсіз өңделеді.

10.2 Қазақстан Республикасы азаматтарының қолжетімділігі шектеулі дербес деректері Қазақстан Республикасының аумағында орналастырылған базада сақталады. Деректерді Қазақстанда сақтау Оператордың АХҚО Қағидалары бойынша міндеттерін жоймайды: серверлердің орналасқан жері емес, деректерді алушының орналасқан жері айқындаушы болып табылады.

10.3 Оператор деректерді қорғаудың ұйымдастырушылық және техникалық шараларын қабылдайды, дербес деректерді өңдеу саясатын бекітеді, жауапты адамды және АХҚО Қағидаларына сәйкес Data Protection Officer-ді тағайындайды. Байланыс: support@scans.kz.

10.4 Дербес деректердің қауіпсіздігі бұзылған кезде Оператор Қазақстан Республикасының уәкілетті органын, АХҚО-ның Commissioner of Data Protection-ын, сондай-ақ бұзушылық оның құқықтары үшін жоғары тәуекел туғызатын болса, зардап шеккен Пайдаланушыны хабардар етеді және инциденттің мән-жайлары мен қабылданған шараларды құжаттайды.

11.1 Оператор жаңа редакциясын scans.kz мекенжайында жариялау арқылы Офертаны өзгертуге құқылы. Өзгерістер, егер жаңа редакцияда өзгеше көрсетілмесе, жарияланған сәттен бастап күшіне енеді.

11.2 Тараптардың қатынастарына акцепт жасалған сәтте қолданыста болған Оферта редакциясы қолданылады. Серіктестердің құрамын немесе өңдеу мақсаттарын бұрын берілген келісім шегінен тыс кеңейту жаңа келісім алуды талап етеді.

12.1 Офертаға Қазақстан Республикасының құқығы қолданылады; Оператордың дербес деректерді өңдеуіне қосымша 1.4-тармаққа сәйкес АХҚО Қағидалары қолданылады.

12.2 Даулар жазбаша кінәрат-талап алынған күннен бастап 30 (отыз) күнтізбелік күн ішінде келіссөздер жолымен, ал келісімге қол жеткізілмеген жағдайда — Қазақстан Республикасының соттарында жауапкердің орналасқан жері (тұрғылықты жері) бойынша шешіледі (ҚР АПК-нің 29-бабы).

12.3 Тұтынушы болып табылатын Пайдаланушы өз таңдауы бойынша талап қоюды өзінің тұрғылықты жері бойынша не шарт жасалған немесе орындалған жер бойынша да беруге құқылы (ҚР АПК-нің 30-бабы). Оферта талаптары бұл құқықты шектемейді. Тұтынушы болып табылатын Пайдаланушы үшін кінәрат-талап жіберу міндетті емес және оны сотқа, дербес деректерді қорғау жөніндегі уәкілетті органға немесе тұтынушылардың құқықтарын қорғау органдарына жүгіну құқығынан айырмайды.

12.4 Оферта қазақ және орыс тілдерінде жасалады; мәтіндер арасында алшақтық болған жағдайда орыс тіліндегі мәтіннің басымдығы болады.

Pulsar.ai Ltd. Жеке компаниясы
БСН 260440900648. «Астана» халықаралық қаржы орталығында 2026 жылғы 9 сәуірде тіркелген.
Орналасқан жері: Қазақстан Республикасы, Астана қаласы, Есіл ауданы, Достық көшесі, 5/2 үй, ВП 3, пошта индексі 010000.
E-mail: support@scans.kz. Telegram-бот: @Ipulsar_ai_bot.
Дербес деректерді өңдеу мәселелері жөніндегі жауапты адам: support@scans.kz.